L’wa7ad ma bi 7ekk jeldo ella defro

(Ma2ta3 mtarjam lal Lebnéneh mn ktéb Le Joueur yalleh 3am eketbo bl Frenséweh)

…Sar machkal l sebe7 bein l Federaliyin wl Mména3jieh. T2awass wa7ad fédéralé b wejj feren Giscard Salloum. L day3a kén nabada fédéralé bass kén fia ktir nés fa2ira yendafa3la mnl mména3jieh ta yekhla2o balbaleh. Ba3d l deher byet3alla2 yafta kbireh “Gloria Libani Data Est Ei” fo2 feren Giscard Salloum w byetmarkazo fédéraliyin 2eddém l ma7all.

L’2ossa ma kénit siyésiyé bein l tnein. Akbar mména3jé bl day3a kén metel ayro kll khatt l mouména3a. Ma kén yhemmo aktar mn fenjéno l ahwé l sebe7, gel cha3rato, w program Toni Khalifé belleil. L’2ossa kenit aktar nkéyet w akhed bl tar mn aktar mn mitein seneh. a2dam b ktir mn halla2.

Jabal Lebnén — 1840

“B leze2 day3etna kén fi day3a ktir zghiré esma Baaloun. Kell iyyéma touw2af ma3 l me7tall. Kella 3ettélé. Yejo yechteghlo 3enna bl day3a ta saro mn sekkén l day3a ma3 l wa2et. Kén fi 3adéwé adimé ben Baaloun w 3aylit Wékim.

B honik nhar ba3ed ma3raké chersé ma3 l 3esméniyin 2allo Wékim wa2ta la ebno enno l wa7ad ma bi 7ekk jeldo ella defro. Ebno la Wékim kén ba3ed atyass menno. Ba3d l ma3rakeh ma3 l 3askar 3esméné n7att salib kbir khachab 3a tallet l’bghal. Ba3ed kamm laylé byejo néss mn Baaloun byebermo wejj l massi7 wl salib sob day3etoun. Bi oum eben Wékim byeb3at 3alam mnl day3a yerja3o yreddo l salib metel ma kén. Bi le2o ba3ed kamm laylé rassein me3zé madbou7in w ma7toutin ta7t l salib. Byeb3ato eben Wékim la Rouféyil L Majnoun 3a Baaloun ywassil riseleh ‘B3atlé a2wa rejjél mn Baaloun y7arebné 3a tallet l bghal. Yallé byerba7 byebermo lal salib sob day3to. W yallé byerja3 byebrom wejj rabna la 3endo baddé nik rabbo.’

Rebi7 eben Wékim l ma3raké w zéd l damm bein 3aylto w day3it Baaloun. W mn wa2ta ma ketro ahel Baaloun bl day3a sar l me7tall yle2ia ahyan yekhro2 l 3iyal l ta2lidiyé yallé keno deyman yettala3o sob l ba7er w sob l ghareb. Tkétaro 3iyal ahel Baaloun w zéd l 7e2ed wl tar wl damm”

…Fetet ana 3al saff mn maylit wara. Kén fi la2eno ktir jeish mn teneh mayleh 3am ytaw2o l machkal. Kenet m2akhar shi noss sé3a. Kellneh wa7el w mayy w mda3ass bl zebel w ri7té tal3a. Khabbeit fedegh rasseh bl abbou3a yalleh sara2ta abel ma ehroub. W fo2 hayda kello kanezteh l souf 3am tchawweklé ra2ebteh w m2ayyra ma3eh mnl talej yalleh fét b aleb jazemteh. Ma 7ada ntabahleh gheir Patricia. Kén estéz l legghat 3am yes2al 3a sot 3aleh 3an kelmé asla fini2é. “7ada bya3rif shou assel kelmet Koun?”. Ma 7adan bl saff seme3 sou2alo. Keno kelloun 3am yettala3o b kalsséto. Sarlo fatra byelbos kell fardeh lone. Ekher fatra 3am yenssa ktir. Sar iyyém yejeh néésseh 3waynéto w iyyém yelbos kell fardeh lone. Kéno l tlémiz yetcharato ben ba3ed 3a lone l kalssét yalleh ra7 yelbessoun teneh nhar. Ma fetet ma3oun bel le3beh la2enno ba3ref b ayya iyyém 3am ye2ta3. Antonio ‘7amra’ metl l 3adeh rebi7 kell l chrout. Abad 75$ b jeme3tein w rebe7 3azimeh 3a Falefel Bou Francis. Bass Bou Francis arato w ma 3ataa wala faleflé la2enno abl b yawmein ata3it emmo la Antonio ‘7amra’ 3al ma77al hiyyeh w kerjeh bhal nzoul. Safa2it arba3 sandwichét w tanket Almaza w ma dafa3it. Shou hal baghlé.

Ba3d l saff ma rje3et 3al beit. Kén naterné Labib L’d3if 3al sé7a ta nle3ab Arez aw Chakhtoura. Chelet souwar la33ibet l football mnl chanta w 7attaytoun bi jaybté. L’Flambeur bi dall yfahhemné ma el3ab 2mar aw le3ab fiya 7azz. L 2mar ma bi 3allim. Richard Saydeh ma t3allam. Khessir kl mesriyéto bl Poker. Bé3 dehbét marto w rakkab dein cha3er kalbein w ma t3allam. Sar yeskar w yejlod marto kell yom ba3d l ghada mn ba3ed kebbeytein Red Label. Ba3ed ma bé3 kell dehbét marto, bé3 dehbét bento yalleh ejouha hdiyeh 3a awwal erbénta. Ma t3allam chi Richard Saydeh. L aghlat li bya3mela l wa7ad bl 2mar ma bet 3allim. Bass bl 7ayét l 3adiyé fi aghlat mazbouta. L awwleh betfawttak b 7itan w ma bet3allmak. Wl tenieh betfawwtak b 7itan bass bet2awwik. Ba3ed ma batal l baseball Yogi Berra khessir l mawsam 3taraf enno ghallat. Al enno aghlato kenit mazbouta “We did too many of the wrong mistakes”. Hek sar batal.

Kén Labib “L d3if” naterneh 3a 7eit l knisseh. Lama7to 3an masséfet miit meter. 2zéz 3waynéto smék byelma3o 3al chamess w bi dall lébis flanelle bayda. Kéno aw2at yetmaniako 3leh y3aytoullo Labib “Manara” la2enno 3waynéto bi bayyno 3al bawékhir li réj3a 3al marfa2. Bass kenna m3awaddine n3ayetllo Labib “L d3if” la2enno kén add l curdoneh. Ma3 enno kén yékol aktar wa7ad fina. Bass kén msemméweh w ydall y3assib. Kell ma y3assib bya3mil machkal. W kell ma ya3mil machkal yekol atleh.

Metel 3adto, kén é3ed 3al 7ajra l kbireh li tal3a mn 7eit l knisseh. Kén 3am yékol kis Master Chips w yla7wes sabi3o. Haydeh l 7ajra be2yit mnl ma3bad l Fini2eh li thaddam w t3ammar faw2o knisset Mar Gergis. L ma3bad kén lal iléh Melkart aw Milk Qart. Ba3do mbayan 3al 7ajra bl zghir kelmet Melqart bl Fini2eh 𐤌𐤋𐤊 𐤒𐤓𐤕. Esmo bye3neh ‘malak l madineh’ w yalleh l younéniyeh bi ouloulo Hercules. Hayda l ma3bad kén yemkin mn akbar ma3ébid Fini2ya. L Fini2iyeh kéno wein ma yrou7o y3ammro ma3bad b esem Melqart. Msh bass b Fini2ya. 7atta bl aradeh wl jozor yalleh kéno yesta3emroua. Herodote bi oul enno l Fini2iyeh 3ammaro ma3bad la Melqart b kaza jazireh. Mn baynéton jaziret Thasos l younéniyeh wa2ta ra7o yfattcho 3al amira l Fini2iyeh Oroppa.

“Chou Labib jebet l souwar?”

“Eh eh jebtoun. Chou Cheyefneh 3am a3mil hon?”

“Yalla nzal mn 3endak ta nballich”

“Tla3 enta”

“Wlk khaless alla taba3eh w nzal!”

“Jebet l lira?”

“La2! Enta ma ma3ak 200 Lira?”

“La2. Araton menneh Antonio 7amra. 3tito kell shi. Bass fina nel3ab b saddit l pepsi.”

“Tayyib rou2 re2ebleh béb l knisseh. Eza fét 7adan 2rot sa3leh.”

Fetet 3al knisseh w bellachet barrim 3a jaat l massareh. Ttala3et wara l madba7 w ta7to. Ma l2it shi. Jarrabet efta7 béb l sacristia bas kén ma2foul. Bi oum byes3ol Labib l D3if.

Hamastello b sot khafif “Eja 7adan?”

“Lah lah! Haydeh sa3leh 3adieh”

“Wlak kss emmak ya Manara!”

“Khalas khalas ta3a. L2it 200 lira 7ajar hon b mazar l 3adra.”

Daharna w a3adna 3a 7aref l batoun 3al sé7a.

“Yalla kebb!” bi elleh Labib

“Meché! Khallina nettefi2. Eza tele3lna arzeh tlat marrat bta3tineh souret Maradona. W eza teli3 chakhtoura marra wa7deh ba3tik kell l souwar li ma3eh. W bra7met ahleh.”

“Mecheh ok mecheh! Khallina nchouf!”

“7lof ya Labib ma betkazzib!”

“Bra7mit ro7 jeddeh Labib”

“7lof b Mar Gergis.”

“Rayto Mar Gergis yo2tochleh lseneh b sayfo eza 3am bkazzib”

Kabbayta lal lira bl jaww w saret tetmarja7 w teghzol. W Labib 3am yettala3 fia w 2zéz 3wayenéto 3am yelma3o 3al chamess. 3youno keno zghar ma bi bayyno. Metel 3youn l senjééb. Kénet l lira 3layya arzeh mn awwal mayleh. L arzeh yalléh 3emlo menna l Fini2iyin bawékheron w zayyano mn khashaba 2sour l Fer3on Akhnaton wl malak l Achoureh Assurbanipal w haykal Slaymén w yalleh ba3dén défa3o 3anna jdoudeh ana w Labib dodd l Mamélik wl Atrak wl Souriyiin w ghayron w yalleh ma3moul menna salib l khashab l kbir l m3alla2o Joseph l le77am 3endo bl ma77al w yalleh 3ata yéh Richard Saydeh ba3ed ma khessir bl Poker. 3a teneh mayleh mnl lira fi chakhtoura. L chakhtoura li 7ammalit jeddeh w jedd Labib 3a Qartaja wl Portugal w yalleh 3emlo fia barmeh déyer mandar kell Afri2ya bi taklifeh mn Fer3one Masser, w ra7o fia kamén 3a Britania, w Espania, w jnoub Fransa, w Malta, w Sicilia, w sob l Younén w Ebros w yemkin Australia w Amérka. Haydeh l chakhtoura 7ekeh 3anna Strabo l younéneh: l Fini2iyin henneh w b tari2on la massdar tijaret l assdir b Espania, btel7a2on chakhtoura mn jeich Roma. Kén hadaf l Rouman yektechfo henné kamén l massdar. Add ma kéno l Fini2iyin ykhabbo asrar tijarton, bi arrir l Captain yda77eh b 7ayéto w 7ayét yalleh ma3o w ygharre2 l chakhtoura. Mét w méto yalleh ma3o. Gher2it l chakhtoura w n7afarit 3al 200 lira li khassarreto la Labib L D3if.

Ghattit l 200 lira 3al ared w ideh faw2a. “Chou Labib! Jéhiz? Bchil ideh?”

Kén 3am yenzal mn sandi7to 3ara2 w ykerro 3a khaddo l zahreh l kello namach w bein 3waynéto. Sar ytalli3 aswat gharibeh bi tall3oua l bsaynét henneh w néymine. Ballach y3assib.

“Chou hayda l sot l m2ayyar l 3am yetla3 men batnak?”

“Chil idak! Yalla! Chil idak 3an l lira!” Ballach Labib yerjof.

Chelet ideh. Toli3 arzeh. Kabbayta teneh marra. Kamén tel3etelna arzeh. We2if Labib abel ékher da22. Sar bser3a y2oul ya 3adra! kaza marra w ysalleb ido 3a wejjo. Télit marra kamen tele3elna arzeh. Bass lama7a Labib 7emel 7alo w harab ma3 l souwar. Seret lé72o w kébiss. 3arbach 3al 7aref w natt sar bi zéroub l 2aranib yalleh bi wassil 3a zéroub bayteh. Laffaytello mn wara beit Richard Saydeh. Hayda l 7ayy 7afzo mnih. Aktar mn Labib. Ata3et 3a balcon Richard Saydeh bl serr w natteit. Toli3 b wejjeh Labib. Sa7abet l souwar mn ido w harabet ta wselet 3al beit.

Kénit setteh 3am tleff wara2 3enab w 3am tesma3 trétil 3al radio. Mn wa2ta ma méto ahleh ma tafit setteh izé3et “Rou7 l Edos” 3enna bl matbakh. Chelet majjalet souwar l football ta lazze2 sourit Maradona. Kén bé2eh ba3ed kam nhar la match Almania l Gharbieh ma3 l Argentine w li sabbab majzara bl day3a bein féderaliyin wl mména3jié. Ba3d l match, ata3it siyyarit Renault sawda eddém Pizza Georges w saro li b alba yzarrko la Saydeh. Richard Saydé kén fedéraleh lal 3adem. Ma 7emelo rasso. Kharda2oun. Reji3 kaffa l pizza taba3o 3a rawa2.